"ПСЖ" ва Марокаш терма жамоасининг 27 ёшли ҳимоячиси Ашраф Ҳакимий Чемпионлар лигаси доирасида "Бавария"га қарши ўйинда (1:2) олган жароҳатидан сўнг ўз ҳиссиётлари билан ўртоқлашди.

Футболчининг сўзларига кўра, ҳозир унинг аҳволи анча яхши.

"Ҳозир ўзимни анча яхши ҳис қиляпман: яллиғланиш йўқолди, ноқулайлик йўқолди. Кайфиятим жанговар - ишлашда давом этяпман ва Африка Миллатлар Кубоги учун формамни имкон қадар тезроқ тиклашга ҳаракат қиляпман," - деди Ҳакими.

Жорий мавсумда футболчи Париж клуби сафида барча мусобақаларда 13 та ўйинда майдонга тушиб, 2 та гол ва 3 та голли узатмага муаллифлик қилган. Бундан ташқари, Ҳакимий Африканинг йилнинг энг яхши футболчиси деб топилди.