«Арсенал», «Ювентус» ва «Челси» клублари айни дамда ижара асосида «Барселона»да тўп сураётган «Манчестер Юнайтед» ҳужумчиси Маркус Рэшфордни сотиб олмоқчи. Бу ҳақда Football365 нашри хабар бермоқда.

Манбанинг маълумотларига кўра, Каталония клуби вингерни ўз сафида олиб қолмоқчи, бироқ ҳозирча уни яна бир бор ижарага олиш вариантини кўриб чиқмоқда. Ўз навбатида, «қизил иблислар» 28 ёшли футболчини сотиб, «катта миқдорда даромад» олишни режалаштирган. Қайд этилишича, «Манчестер Юнайтед» ўз рақибларини кучайтириб юбормаслик учун Рэшфордни «Арсенал» ёки «Челси»га сотишдан бош тортиши мумкин.

Жорий мавсумда Рэшфорд барча турнирларда 38 та ўйинда иштирок этиб, 10 та гол ва 13 та голли узатмага муаллифлик қилди. Transfermarkt портали тақдим этган маълумотларга кўра, футболчининг бозор қиймати 40 миллион еврони ташкил этади.