“Барселона” клуби президенти Жоан Лапорта Испания чемпионатидаги ҳакамлик борасида ўз фикрларини билдириб ўтди. El Pais нашрининг хабар беришича, клуб раҳбари ҳакамлар қарорлари кўпинча Мадриднинг “Реал” жамоаси фойдасига чиқарилишини таъкидлаган.

Лапортанинг сўзларига кўра, ҳакамлик корпусида каталонияликларга нисбатан маълум даражада холислик етишмайди.

“Мен ҳар доим жамоамиз рақиблардан анча кучли бўлиши керак деб ҳисоблаганман, чунки ҳакамлар бизга хайрихоҳлик билдирмайди. Уларнинг қарорлари кўпинча ‘Реал’га ёрдам бераётгандек кўринади. ‘Барселона’га нисбатан эса нотўғри муносабат мавжуд”, дейди Жоан Лапорта.

“Барселона” президенти Лионель Мессининг клубни тарк этиши билан боғлиқ шов-шувли воқеаларга ҳам муносабат билдирди. Лапортанинг сўзларига кўра, у ўша пайтда ҳиссиётларга берилмасдан, клуб манфаатини устун қўйган.

“Мен қилишим керак бўлган ишни қилдим. Мессининг қолишини истардим, аммо иқтисодий сабабларга кўра бу имконсиз эди. Лео фаолиятининг якунида эди, бизга эса янги жамоа ва авлодлар алмашинуви керак эди. Натижалар кўрсатиб турибдики, мен ҳақ бўлганман: биз клуб иқтисодиётини тиклашга ва рақобатбардош жамоа тузишга муваффақ бўлдик”, дейди у.

Маълумот учун, Испания Ла Лигасининг 29-туридан сўнг “Барселона” 73 очко билан турнир жадвалида пешқадамлик қилмоқда. Иккинчи ўриндаги “Реал” ҳисобида эса 69 очко мавжуд. Навбатдаги турда “Барселона” ўз майдонида Мадриднинг “Атлетико” жамоасини қабул қилади, “Реал” эса “Мальорка” меҳмони бўлади.