«Барселона» бош мураббийи Ханс-Дитер Флик тез орада янги шартнома имзолайди. Журналист Николо Скиранинг хабар беришича, томонлар аллақачон принципиал келишувга эришган. Германиялик мутахассис 2028 йилнинг ёзига қадар мўлжалланган янги битимни тузишга рози бўлди. Яқин кунларда барча ҳужжатлар имзоланиши кутилмоқда.
Ханс-Дитер Флик «кўк-анорранглилар» бошқарувини 2024 йилда қўлга олган эди, унинг амалдаги шартномаси 2025/26 йилги мавсум якунида ўз ниҳоясига етади. Ҳозирги устоз қўл остида Каталония гранди Ла Лига, Испания кубоги ва мамлакат Суперкубогида (икки марта) ғолиб чиқишга улгурди, шунингдек, Чемпионлар Лигасининг ярим финалига қадар етиб борди.
