Туркия Суперлигасининг 28-туридан ўрин олган “Кожаэлиспор” ҳамда “Башакшеҳир” жамоалари ўртасидаги учрашув якунига етди. Измит шаҳридаги “Йилдиз Энтегре” стадионида кечган баҳсда жамоалар дуранг натижа қайд этди — 0:0.

Ўзбекистон миллий терма жамоаси сардори Элдор Шомуродов ўйинни асосий таркибда бошлади. У майдонда фаол ҳаракат қилган бўлса-да, рақиб дарвозасига йўл топа олмади ва 83-дақиқада Нуну Да Кошта билан алмаштирилди. Шу тариқа, Элдорнинг “Башакшеҳир” сафидаги барча мусобақалар доирасидаги голсиз серияси 6 та ўйинга етди (“Коняспор”, “Трабзонспор”, “Гёзтепе”, “Галатасарой”, “Анталяспор” ва “Кожаэлиспор”. Шомуродов ҳозирда 16 та гол билан тўпурарлар жадвалида иккинчи поғонани банд этган. “Трабзонспор” ҳужумчиси Пол Онуачу эса 22 та гол билан пешқадамлик қилмоқда.

Турнир жадвалида “Галатасарой” 64 очко билан якка пешқадам бўлиб турибди. “Фенербаҳче” ва “Трабзонспор” жамоалари эса 63 очко билан кучли учликни якунлаб беришган.

Истанбул клубининг яна бир ўзбекистонлик аъзоси Аббосбек Файзуллаев эса ушбу учрашув қайдномасига киритилмади.

Мазкур натижадан сўнг “Башакшеҳир” очколарини 44 тага етказиб, турнир жадвалида 6-ўриндан жой олди. 34 очкога эга бўлиб турган “Кожаэлиспор” эса 8-поғонани банд этган.

Истанбул клуби навбатдаги учрашувини 11 апрель куни ўз майдонида “Генчлербирлиги”га қарши ўтказади.

Туркия Суперлигаси, 28-тур
“Кожаэлиспор” — “Башакшеҳир” 0:0