Каталониянинг «Барселона» клуби Испания чемпионати турнир жадвалида Мадриднинг «Реал» жамоасидан тўққиз очколик фарқ билан олдинда бормоқда. Шу билан бирга, ушбу икки клуб 10 май куни ўзаро тўқнаш келади.
Агар ўша вақтгача жамоалар ўртасидаги ҳозирги тўққиз очколик фарқ сақланиб қолса (яъни, улар ўзаро ўйингача бўлган барча учрашувларда ғалаба қозонишса), у ҳолда «Барселона»да айнан «эл- класико»да муддатидан олдин чемпионликни қўлга киритиш имконияти туғилади.
Ушбу икки муросасиз рақиб ўртасида икки юзга яқин ўйин ўтказилган бўлса-да, Испания чемпионати тарихида ҳали ҳеч қачон бундай ҳолат кузатилмаган.
