Англия Премьер Лигасининг 35-тури доирасида “Эвертон” ўз майдонида мусобақа ғолиблиги учун курашаётган “Манчестер Сити”ни қабул қилди. Беллашув 3:3 ҳисобида якунланди. Ушбу баҳсда Ўзбекистон терма жамоаси ҳимоячиси Абдуқодир Ҳусанов “шаҳарликлар” асосий таркибида майдонга тушиб, тўлиқ 90 дақиқа ҳаракат қилди.

Ҳусанов ўйин давомида 80 марта тўп билан муомала қилди. Ҳимоячи жами 62 та узатманинг 58 тасини аниқ амалга оширди (94 фоиз аниқлик). Sofascore портали Абдуқодирнинг ҳаракатларини 6,6 балл билан баҳолади.

Абдуқодир Ҳусановнинг ҳимоядаги кўрсаткичлари:

Ҳимоявий ҳаракатлар: 10 та;
Ташланиб тўпни олиб қўйиш: 3 марта (2 таси муваффақиятли);
Тозалашлар: 4 марта;
Зарбага тўсқинлик қилиш: 3 марта;
Ҳаводаги курашлар: 2 та (биттаси муваффақиятли);
Ердаги курашлар: 6 та (барчаси муваффақиятли);
Тўпни қайтариб олиш: 8 марта;

“Манчестер Сити” сафида дубль муаллифи бўлган Жереми Доку учрашувнинг энг яхши футболчиси, деб топилди. Sofascore томонидан белгиялик футболчининг ҳаракатлари 9,8 баллга лойиқ кўрилган бўлса, “шаҳарликлар”нинг иккинчи голини киритган Эрлинг Ҳоланд 7,5 балл олди. Мезбонлар сафида эса захирадан майдонга тушиб, дубль қайд этган Тиэрно Барри 8,9 балл билан баҳоланди.