«Барселона» ҳужумчиси Ламин Ямаль нима сабабдан майдонга қўлига боғлам таққан ҳолда тушишига ойдинлик киритди.
«Ўйинлар вақтида қўлдаги боғламми? Гап шундаки, кунлардан бир кун мен PlayStation ўйнаётганимда телевизорга уриб юборганман ва бармоқларим шишиб кетган. Кейин эса бу боғлам худди Карим Бенземаникидек ўзимга жуда ярашаётганини кўрдим», — дея Ямалнинг сўзларини келтиради Madrid Extra.
Ламин Ямаль «Барселона» клуби тарбияланувчиси ҳисобланади. Унинг каталонияликлар билан амалдаги шартномаси 2031 йилнинг 30 июнига қадар мўлжалланган.
2025/26 йилги мавсумда форвард «кўк-анорранглилар» сафида барча турнирларда 45 та учрашувда майдонга тушиб, ўз ҳисобига 24 та гол ва 18 та голли узатмани ёздириб қўйди. Transfermarkt портали Ямальнинг бозор қийматини 200 миллион еврога баҳоламоқда.
