Испания Сегундаси плей-офф босқичининг ҳал қилувчи баҳслари якунлангач, Ла Лиганинг 2026/27 йилги мавсумида иштирок этадиган барча жамоалар номи маълум бўлди.

Плей-офф финали жавоб учрашувида «Малага» ўз майдонида «Альмерия»ни 2:1 ҳисобида мағлуб этди. Биринчи баҳсда ҳисоб очилмагани учун (0:0), икки ўйин натижасига кўра «Малага» элита дивизион йўлланмасини қўлга киритди.

Бундан аввал «Расинг» (Сантандер) ва «Депортиво» (Ла-Корунья) ҳам Ла Лигага чиқиш ҳуқуқини таъминлаган эди.

Ўз навбатида, 2025/26 йилги мавсум якунларига кўра «Овьедо», «Жирона» ва «Мальорка» юқори дивизионни тарк этди.

Шу тариқа, Ла Лига-2026/27 мавсуми иштирокчилари қуйидагилардан иборат бўлади:

«Барселона», «Реал» (Мадрид), «Вильярреал», «Атлетико» (Мадрид), «Бетис», «Сельта», «Хетафе», «Реал Сосьедад», «Райо Вальекано», «Атлетик» (Бильбао), «Алавес», «Осасуна», «Валенсия», «Севилья», «Эльче», «Эспаньол», «Леванте», «Расинг», «Депортиво» ва «Малага».

Маълумот учун, Испания чемпионатининг янги мавсуми 2026 йил август ойи ўртасида старт олади. Амалдаги чемпион — «Барселона».