Испания терма жамоаси ва «Барселона» вингери Ламин Ямал Хулиан Альвареснинг Каталония клубига эҳтимолий трансфери ҳақида ўз фикрини билдирди.

Аввалроқ, «кўк-анорранглилар» «Атлетико» ҳужумчиси учун тахминан 130 миллион евро таклиф қилиши мумкинлиги хабар қилинган эди. Катта эҳтимол билан, «блауграна» бу қадамни Жаҳон чемпионати якунланганидан кейин ташлайди.

«Ҳозир бу ҳақда жуда кўп ўйлаётганим йўқ, лекин ушбу трансфер амалга ошишидан умидворман, чунки у ажойиб футболчи. Агар у келса, уни қучоқ очиб кутиб оламиз.

Менинг фикримча, у дунёнинг энг яхши клубига, дунёдаги энг яхши мухлислар ҳузурига ва дунёнинг энг гўзал шаҳрига кўчиб ўтган бўлади. Шундай экан, агар мен унинг ўрнида бўлганимда, албатта розилик берардим. Агар у келишни истаса, биз уни кутамиз, олға!» — деди Ямал El Larguero нашрига берган интервьюсида.