Агар Андреа Пирло терма жамоа бош мураббийи этиб тайинланмаса, Паоло Мальдини Италия футбол федерацияси техник директори лавозимидан кетиши мумкин, деб хабар бермоқда La Gazzetta dello Sport.
Аввалроқ Пирлонинг Россия букмекерлик компанияси билан ҳамкорлиги Италияда кенг муҳокамаларга сабаб бўлгани ва бу унинг миллий терма жамоа билан шартнома тузишига таъсир қилиши мумкинлиги маълум бўлган эди.
Манбанинг таъкидлашича, ушбу вазият Мальдини учун кутилмаган ҳолат бўлди. Паоло футболга алоқадор бўлмаган сабаблар мураббий танловига таъсир кўрсатиши мумкинлигига тайёр эмас эди.
«Милан»нинг собиқ ҳимоячиси айнан ўзи терма жамоага янги бош мураббийни мустақил равишда танлаши бўйича кафолат олгач, техник директорлик лавозимини эгаллашга рози бўлгани маълум.
Пеп Гвардиола терма жамоани бошқариш таклифини рад этгач, Мальдини танлови Пирлога тушган эди. У Пирлони узоқ муддатли лойиҳа доирасида ишлашга тайёр бўлган замонавий мураббий деб ҳисоблайди. Шу сабабли у Роберто Манчини ва Антонио Конте номзодларини рад этган эди.
