«Барселона» аргентиналик ҳужумчи Хулиан Альварес трансфери амалга ошмаган тақдирда унинг ўрнига кимни олишини аниқлаб олди. «Атлетико»нинг позицияси туфайли Альварес трансфери мураккаблашаётган бир пайтда, Sport.es нашри хабар беришича, «Интер» ҳужумчиси Лаутаро Мартинес «Барселона» учун «B» режаси сифатида асосий номзодлардан бирига айланмоқда. Каталонияликлар яқин кунларда Альварес бўйича музокараларда ижобий силжиш бўлмаса, ушбу вариантни кўриб чиқади.

Манбага кўра, «Барселона» учун Лаутаро трансфери ҳам осон бўлмайди. Футболчининг «Интер» билан шартномаси 2029 йил июнь ойига қадар амал қилади. Ўтган йил май ойида аргентиналик футболчининг ўзи очиқ тарзда бошқа клубга ўтиш эҳтимолини истисно қилган эди. «Интер» президенти Жузеппе Маротта ҳам «Барселона» билан ҳеч қандай музокаралар олиб борилаётганини қатъиян рад этган.

ОАВ маълумотларига кўра, «Интер» Мартинесни тахминан 120 миллион евро эвазига қўйиб юборишга тайёр.