«Челси» ҳужумчиси Давид Фофана фаолиятини Швейцарияда давом эттиради.

«Серветт» клуби Кот-д’Ивуар терма жамоаси футболчиси билан 2030 йил ёзига қадар шартнома имзолаганини маълум қилди. Фофана 23 ёшда.

Аввалроқ трансфер қиймати 2,5 миллион еврони ташкил қилиши, шунингдек, бонуслар сифатида яна 1 миллион евро тўланиши ҳақида хабар берилганди.

Фофана аввал «Унион», «Бёрнли», «Гёзтепе», «Фатих Карагюмрюк» ва «Страсбург» клубларида ижара асосида тўп тепган.

У 2023 йилда «Челси»га ўтганидан сўнг асосий жамоа сафида 4 та ўйинда майдонга тушган, аммо самарали ҳаракатлари билан ажралиб тура олмаган.