Ўзбекистонлик гроссмейстер Нодирбек Абдусатторов “Лолазор” подкастига берган интервюсида ўзини франциялик футбол юлдузи Килиан Мбаппега ўхшатишини айтди. Подкаст бошловчилари шахматчидан ўзини футболда кимга қиёслашини сўради. Абдусатторов Мбаппе номини тилга олиб, у билан ўртасидаги ўхшашликни терма жамоа сафидаги ўйинлари ва жамоавий руҳ билан изоҳлади.

“Менимча, характеримизда ўхшашлик бор. Мен ҳам жамоа учун яхши ўйнайман, терма жамоа сафида эса ўзгача очиламан. Ченнай, Будапешт ва Самарқандда ўтган учта шахмат олимпиадасида қатнашиб, атиги бир марта мағлуб бўлганман. Ўз тахтамда доим биринчи ёки иккинчи ўринни эгаллаганман. Мбаппе ҳам Франция терма жамоасида ўйнаганда ўзини бошқача намоён қилади. Буни Жаҳон чемпионатларида ҳам кўрдик. Шу жиҳатдан ўзимни унга ўхшатаман”, деди Абдусатторов.

Маълумот учун, Нодирбек Абдусатторов ўзбек шахматининг энг таниқли вакилларидан бири. У 2022 йилда Ҳиндистоннинг Ченнай шаҳрида ўтказилган Бутунжаҳон шахмат олимпиадасида Ўзбекистон терма жамоаси билан олтин медални қўлга киритган. Жамоа орадан тўрт йил ўтиб, Самарқандда ташкил этилган 46-Бутунжаҳон шахмат олимпиадасида ҳам чемпионликни такрорлаган.

Шунингдек, Абдусатторов Самарқанддаги мусобақада биринчи тахтада ҳам олтин медалга сазовор бўлди.