Каталониянинг «Барселона» клуби президенти Жоан Лапорта жамоа намойиш этаётган футболдан мамнун эканини билдирди. Унинг фикрича, ҳозирги муваффақиятлар замирида икки йил аввал қабул қилинган қарорлар ётибди.
«Барча қатъият билан ҳаракат қилмоқда. Жамоа машғулотларда қандай фидойилик кўрсатаётганини ўз кўзим билан кўрдим.
Кийиниш хонасидаги муҳит — барча муваффақиятларнинг калити. Бунда Флик, Деку ва мураббийлар штабининг ҳиссаси катта.
Деку ва Флик тандеми ажойиб ишламоқда. Жамоада ҳақиқий юксак мақсадларга интилиш сезилмоқда ва жуда яхши муҳит ҳукм сурмоқда.
Чунки майдонга тушаётган футболчилар ажойиб ўйин намойиш этмоқда, ҳали ўйнаш имкониятига эга бўлмаганлар эса жамоадошларининг натижаларидан ҳам яхшироқ кўрсаткич қайд этишга интилмоқда», — дея Лапортанинг сўзларини келтирмоқда derbyderbyderby.it нашри.
Эслатиб ўтамиз, «Барселона» жорий мавсумда ўтказган барча 10 та учрашувда ғалаба қозонган.
