Каталониянинг «Барселона» клуби аввалги рекорд ўрнатилганидан атиги бир неча ой ўтиб, «эл-класико» учрашувини ўтказишдан тушган даромад бўйича янги рекорд қайд этди. Бу Мадриднинг «Реал» клубига қарши баҳснинг нафақат спорт, балки молиявий жиҳатдан ҳам улкан аҳамиятга эга эканини кўрсатади.
«Камп Ноу» стадионида бўлиб ўтган учрашув «Барселона» ғазнасига беш ой аввалги рекорддан анча кўп маблағ келтирди.
Бундай натижага чипталар нархини ошириш ва VIP-жойлар сонини кўпайтириш орқали эришилди. Жумладан, стадионнинг иккинчи ярусида тўртта янги қатор қўшилди.
Аввалги рекорд 10 май куни бўлиб ўтган «эл-класико»да қайд этилган эди. Ўшанда каталонияликлар Ла Лига чемпионлигини таъминлаган учрашувдан 16 465 731 евро даромад олишган.
Бу сафар эса «Барселона»нинг тушуми 19 105 768 еврони ташкил этди. Шу тариқа клуб аввалги рекордини янгилади.
