«Ростов» клубининг собиқ спорт директори Пол Эшуорт Eurosport.ru сайтига анча ошкора интервью берди. Хусусан, «Ростов» раҳбарияти вақтида ўйинни «Рубин»га сотишни илтимос қилгани, Александр Цауняга Брендан Рожерс томонидан қизиқиш бўлгани ва Питер Одемвинжининг «Вест Бромвич»дан «КПР»га қандай «қочгани» хусусида гапириб берди.
- Сиз Россия чемпионатида ишлаган англиялик ягона мураббий ҳисобланасиз. Аввало, 2005 йили «Ростов»га қандай келганингиз ҳақида сўзлаб берсангиз...
- Дўстим ва агентим - Андрей Бахарев ўша вақт «Ростов» президенти лавозимида ишлаган Иван Саввиди билан менинг жамоа бош мураббийи бўлишим варианти хусусида гаплашган. Бироқ ўшанда бу режа амалга ошмади. Орадан яна 1 йил ўтгач, Саввидининг ўзи мени спорт директори лавозимига таклиф этди.
- Хўш, биринчи навбатда, мураббиймисиз ёки спорт директори?
- Мураббийлик соҳасига яқинроқ бўлсам керак. Бироқ спорт директорининг иши ҳам бу соҳага чамбарчас боғлиқ. Ҳозирда ҳар иккиси билан шуғулланаман. Турли лавозимларда иш юритиш асносида барчаси қандай тузилганини теранроқ тушунасан. Зеро, авваллари мураббий ассистенти сифатида фаолият юритганман, ёшлар жамоаси ва академияни бошқарганман. Яна ўйновчи-мураббий ролини ҳам бажариб кўрганман.
- Валерий Карпин «Спартак»да ҳам бош мураббий, ҳам бош директор ролида фаолият юритганида, кўпчилик бунга танқидий руҳда қараганди...
- Англияда менежер тушунчаси бор. Айтайлик, Алекс Фергюсон худди шундай мақомда эди. Яъни у ҳам мураббий, ҳам директор мажбуриятларини ўз зиммасига олганди. Фақат охирги 5 йилдан буён Англияда бу вазифаларни ажрата бошлашди. Лекин Карпин ишлаган тизим туманли ўлкада узоқ вақт қўлланилган, яна муваффақиятли тарзда.
- Унда айтингчи, Англияда бу тизим нега секин-аста четга чиқяпти?
- Чунки футболда катта маблағ айланяпти, эътибор кучайди, босим ҳам. Хуллас, бир кишининг ҳам машғулотлар жараёни, ҳам трансфер ишларини назорат қилиши қийинлашди. Яна ОАВ ва бошқалар билан муносабатлар бор...
- «Ростов»да клуб инфратузилмаси ва трансферлар устида ишладингиз. Бир неча ойда нималарга улгурдингиз?
- Футболчилар янги майдонга кўчиб ўтишди. Отелни ҳам ўзгартирдик. Бундан ташқари, Исо Каньендани «Локомотив»га сотдик. Ўйлайманки, 2 миллионли трансфер «Ростов» учун анча омадли келишув эди.
- «Зенит»нинг собиқ футболчиси Фернандо Риксеннинг айтишича, бир сафар унга 3 миллион рублни нақд шаклида беришган ва у бундан ғоят ажабланган экан. Сизчи, Россияда нимадан кўпроқ лол қолгансиз?
- Битта воқеани айтиб беришим мумкин. Аввалига бош мураббий лавозимига тайинлашганидан «шок»ка тушдим. Кейин эса мендан ўйинни «ташлаш»ни сўрашди.
- «Ташлаш»...
- Аниқроқ айтсак, «Рубин»га ютқазиб беришни. Мен эса бундай ниятим йўқлигини айтганман ва қозонликлар билан 1:1 ҳисобини қайд этганмиз.
- Ўйинни ютқазиб беришни айнан ким сўраганди?
- Клубдаги муҳим шахслар. Жамоа раҳбарияти дейиш ҳам мумкин.
- Бу ҳақда «Ростов» президенти Иван Саввидига айтганмисиз?
- Ҳа. У барчасидан хабардор эди. Саввиди мендан яна битта ўйинда жамоани бошқаришимни илтимос қилди ва бунга рози бўлдим. Бироқ «Амкар»га ютқазиб қўйдик - 0:1.
- Сиздан яна қаердадир ўйинни «бериш»ни сўрашганми?
- Фаолиятим давомида Англия, Латвия ва Нигерияда ҳам ишладим. Лекин ўйинни ютқазиш лозимлигини дангал айтиш ҳолатига бошқа ҳеч қаерда дуч келмадим.
- Ўйинни «бериш» лозимлигини айтишганида, буни футболчилар билан муҳокама қилганмисиз?
- Ҳа. Биринчи навбатда, айнан футболчиларга мурожаат этиб, ўйинни сотиш фикридан йироқ эканлигимни тушунтирдим. Гап футболчиларда қолганди.
- Улар қандай жавоб беришди?
- «Рубин»га ютқазиб беришни хоҳламасликларини айтишди. Дарвозабон Чичкинга ҳам ўйинни «бериш»ни таклиф қилишган экан. Лекин у ҳам худди мен каби раҳбариятга атайлаб тўп ўтказиб юбормаслигини айтган. Жамоа сардори Михаил Осинов ҳам қарши чиққан. Тўғри, ўша воқеанинг барча икир-чикирларини эслашим қийин, ахир орадан 9 йил ўтибди. Николай исмли ўзбекистонлик чап қанот ҳимоячиси бўларди. Адашмасам, Ширшов. У ва Каньенда билан ҳам гаплашганман. Тўғри, бу ҳақда малавилик билан гаплашишга ҳожат йўқ эди. Чунки одатда хорижликлардан ўйинни «бериш»ни сўрашмайди. Натижада ўша учрашувда Каньенда «Рубин» дарвозасига гол урганди.
- Нега бу ҳақда орадан 8 йил ўтибгина айтяпсиз?
- «Ростов»дан кетишим сабабини олдин ҳеч ким сўраган эмасди. Бундай нарсалар ҳақида ўзимча гапиришни эса ёқтирмайман. Қолаверса, «Ростов»да озми-кўп ишладим ва клубга ёмонликни раво кўрмайман. Бошқа тарафдан, журналист саволига очиқ жавоб беришга мажбурман.
- «Ростов» вакиллари билан алоқаларингиз сақланиб қолганми?
- Ҳа. Кўпчилик билан қўнғироқлашиб тураман. «Ростов» қалбимда қолган. Фақат жамоада жуда оз вақт ишлаганимдан афсусланаман.
- «Ростов» ўйинларни сотишда давом этяптими?
- Танишларимдан бу ҳақда сўрамайман. Менимча, «олди-сотти»лар 10 йил аввалгига нисбатан анча камайган. Ўйлайманки, Россияда ҳаммасини яхши тушунишади. Чемпионат охирида айрим жамоалар очкога эҳтиёж сезишади - лигадан тушиб кетмаслик учун. Шунда ўртамиёна рақиблар билан келишиб ўйнашади. Яъни келаси мавсум 3 очкони қайтариш шарти билан ўйинни сотиб олишади.
- Латвияда ишлаганингизда Александр Цаунянинг ЦСКАга ўтишида ёрдам берганингиз ростми?
- Йўқ. Цаунянинг кўрикдан ўтиши ҳақида «Челси» ўринбосарлар мураббийи Брендан Рожерс билан гаплашганман. Кўп ўтмай, у «Уотфорд» бошқарувини қўлга олди ва латвиялик ярим ҳимоячини жамоасига таклиф этди. Натижада Саша Англияда бебаҳо тажриба тўплади.
- Цауня қайси жиҳатлари билан эътиборингизга тушганди?
- У билан 4,5 йил бирга ишладим. 16 ёшидаёқ асосий таркибда майдонга туширдим ва гол урди. Унинг ўрнида 16 ёшли бошқа футболчи ҳаяжонланарди. Қисқаси, Цауня руҳан кучли футболчи.
- Ҳозирда Нигериядаги академияда ишлаяпсиз. Африкалик футболчиларнинг руҳий тайёргарликлари кўп ҳолда панд беради. Тўғрими?
- Йўқ. Мисол учун, нигериялик футболчиларнинг ишга муносабатларидан лол қолдим. Менимча, Европада уларга тўғри баҳо беришмайди. Яна африкаликларнинг фаолиятлари янада ёрқинроқ кечишига агентлар халақит беришади.
- Мисол борми?
- Питер Одемвинжи. Унинг «Локомотив»дан «Вест Бромвич»га ўтишига ҳисса қўшгандим. Бу ҳақда Питернинг нигериялик агенти илтимос қилганди. Акам Дэн Эшуорт ҳозир Англия футбол ассоциациясида ишлаяпти, ўшанда «Вест Бромвич»да спорт директори эди. Хуллас, унга Одемвинжини тавсия этдим. Клубдагилар унинг Нигерия термаси ва «Локомотив»даги ўйинларини кўришгач, москваликларга аниқ таклиф билан чиқишди. Бу «Вест Бромвич» учун ажойиб харид бўлганини вақт кўрсатиб берди. Бироқ ишлар яхши кетаётган маҳал Одемвинжи шахсий агенти туфайли «КПР» эшиги олдида пайдо бўлди.
- Якунда «Вест Бромвич» музокаралар олиб боргани учун жаримага ҳам тортилди. Нима сабабдан бундай тушунарсиз ҳолат юзага келди?
- Агентнинг мақсади - келишувдан пул олиш. Африкаликлар эса ёши катталарни ниҳоятда ҳурмат қилишади. Ҳатто шу даражадаки, агент нимани сўраса, шундай қилишади. Хуллас, Питер ўз агентининг гапига қулоқ солиб, панд еди.
