Франция терма жамоаси гуруҳнинг дастлабки ўйинида ортиқча муаммосиз 3 очкони қўлга киритди. Гондурас европаликларга бир бўлим давомида қаршилик кўрсата олди.

Биринчи бўлим сўнгида гондураслик ҳимоячи Паласиос жарима майдончаси ичида Погбага нисбатан ўйин қоидасини бузди. Пенальтидан ташқари, ҳимоячига иккинчи сариқ карточка кўрсатилди. Бенземадан пенальтидан унумли фойдаланди ва ҳисобни очди.

Майдонда бир киши кам бўлиб қолган гондурасликлар иккинчи бўлимни фақат ҳимояда ўтказишган бўлса-да, ҳисоб йирик кўринишга келди. Французларнинг  иккинчи голи махсус технология ёрдамида аниқланди. Ҳужумчи Карим Бенземанинг зарбасидан кейин тўп дарвоза устунига тегиб қайтди ва дарвозабон Ноэль Вальдаресга тегиб, дарвоза чизиғини кесиб ўтди. Ушбу вазиятни оддий кўз ёки такрорий лавҳалар билан аниқлаш қийин эди. Фақатгина ушбу ЖЧдан бошлаб қўлланилаётган "гол-лайн" технологияси тўпнинг чизиқни тўлиқ кесиб ўтганини аниқлаб берди. Бу гол Вальядарес ҳисобига автогол сифатида ёзилди.

Ўйиннинг 72-дақиқасида эса Бензема кучли зарба билан дарвозани ишғол қилди ва ҳисобни 3:0га етказди.

Франция – Гондурас 3:0 (1:0)
Голлар: 1:0 – 45, пенальти Бензема, 2:0 – 48, автогол Вальядарес, 3:0 – 72 Бензема.
Франция – Льорис, Дебюши, Варан, М. Сако, Эвра, Погба (Сиссоко, 57), Матюиди, Кабай (Мавуба, 65), Вальбуэна (Жиру, 78), Гризманн, Бензема.
Гондурас – Вальядарес, Бекелес, Бернардес (О. Чавес, 46), Фигероа, Изагирре, Паласиос, Гарридо, Нахар (Кларос, 58), Эспиноза, Бенгтсон (О. Гарсия, 46), Костли.
Огоҳлантиришлар: Эвра (7), Погба (27), Паласиос (28), Кабай (45), О. Гарсия (53), Гарридо (83).
Четлатиш: Паласиос (43).