Эрон терма жамоаси бош мураббийи Карлуш Кейрушнинг таъкидлашича, Бразилиядаги Жаҳон чемпионати ниҳоясига етгач, унинг Эрондаги миссияси ўз якунига етади ва у терма жамоани тарк этади.
Португалиялик мутахассиснинг айтишича, Эрон Футбол Асосиацияси унинг терма жамоада қолишини сўраган ва Кейрушга етарлича шароит яратиб беришга ваъда берган, бироқ молиявий муаммолар сабаб Кейруш терма жамоадан кетишга қарор қилган.
"Мен Жаҳон чемпионати якунига етгач Эрон терма жамоаси билан алоқаларимни узаман. Бу ерда қолишим учун Эрон футболи раҳбарлари ҳар қандай хоҳишимни бажаришга ҳаракат қилишларини айтишмоқда. Шуни тушунишингизни хоҳлардимки, биз анча вақтдан буён олиб бораётган ишимиз - терма жамоани ривожланитиришни давом эттиришимиз молиявий шароитларга боғлиқ. Бироқ, ҳукумат томонидан етарлича қўллаб-қувватлаш бўлмаяпти. Шунинг учун ҳам, улар билан суҳбатимиз ўз ниҳоясига етган ва мен аллақачон бу ерда ортиқ қолмаслигим ҳақида қарор қабул қилиб бўлганман" дейди 61- ёшли мутахассис.
Хабарингиз бор, Эрон терма жамоаси Жаҳон чемпионатининг илк турида Нигерия терма жамоаси билан баҳс олиб борган ва 0-0 ҳисобида дуранг қайд этган. Карлуш Кейруш шогирдлари 21 июнь куни Аргентина терма жамоасига қарши баҳс олиб боришади.
