• O'zb
• Рус
• Eng

Уч карра Осиё чемпионлари 10 январда Хитойга қарши Австралия 2015 мусобақасида биринчи учрашувларини ўтказишга тайёргарлик кўраётган бир пайтда Космин Олариу Саудия Арабистони терма жамоасининг руҳий ҳолатини кўтаришга ҳаракат қилаяпти.

Руминиялик мураббий жамоаси якшанба кечаси Парраматтада Корея Республикасига 0:2 ҳисобида мағлуб бўлди, аммо собиқ Ал-Ҳилол ва Ал-Айн мураббийининг кўнгли жамоасининг ўйинидан барибир тўлди.

“Улар 60 дақиқа жуда яхши ўйнаганларидан мамнунман,” Осама Хавсавининг автоголи ва Кореяликлар таркибида дебют қилган Ли Жеонг Хеоп томонидан учрашув якунига яқин киритилган гол эвазига жамоаси ютқазган Олариу деди.

“Ҳозир майдонда ўйинни ташкил қилиш бўйича бир қадам олдинга ташладик ва бугунги кунда жамоанинг жисмоний ҳолатини тиклаш, мусобақа бошланишига қадар куч-қувватга тўла ҳолда етиб келиш қийин”.

Саудияликлар ноябрь ойида Форс кўрфази кубогининг финалида мағлубият аламини тотиб кўрганликларидан сўнг Хуан Рамон Лопес Каро лавозимдан бўшатилгандан сўнг, мусобақа бошланишига саноқли кунлар қолганда Олариу бош мураббий этиб тайинланди, ва 45 ёшли мураббий унинг ушбу минтақадаги тажрибаси жамоага ғайрат бағишлашида роль ўйнай олади деб умид қилади.

“Мен Саудияда олдин ишлаганман, бу ўйинчиларни кўпдан бери биламан, уларнинг кўпчилиги ёшлигида мен билан ўйнаган ва тажриба орттирган ва баъзилари менга қарши ўйнаган,” деди у. “Лекин, энг аҳамиятлиси жамоанинг руҳий ҳолатини кўтаришга ҳаракат қилишдан иборат. Кимдир биздан яхшироқ, тезроқ, кучлироқ ўйнаши мумкин, аммо улардан кўра кўпроқ исташимиз шарт ва бу бизнинг мақсадимиздир”.

Тайёргарлик вақти чекланганлиги туфайли жамоа таркибини деярли ўзгартира олмаслигини Олариу билади, бироқ мавсум давомида асосий ўйинчиларининг кўпчилигига қўйилган талаблар туфайли мураббийни энг кўп ҳавотирга солаётган нарса – бу чарчоқдир.

“Мен қўлимдан келганча ҳаракат қилаяпман, биз ўйинчилар билан кўп суҳбат ўтказаяпмиз, улар билан ишлаяпмиз ва ишимиз уларга қандайдир ёрдам бераётганидан хурсандман ва улар ўзига бўлган ишончни сақлаб қолишади ва ўйиндан-ўйинга улар яхшироқ ўйин намойиш қилишади деган умиддаман,” деди у.

“Биз имкон қадар ҳаракат қиламиз, лекин қанчалик яхши ўйнашимиз мумкинлигини айтиб бўлмайди. Умид қиламанки, кейинги ўйинда улар бунданда яхшироқ ўйин намойиш этишади.”

“Муаммо шундаки, уларнинг жисмоний ҳолати яхшиланиши иложсиз, ҳар тўрт кун ўйнайдиган бўлсак, бу қийин масала. Муаммо шундан иборатки, ўйинчилар жуда узоқ ўйинлар, Форс Кўрфази Кубоги, мамлакат кубогидаги кўп сонли ўйинлардан кейин бизнинг ихтиёримизга келишди, «Ал-Ҳилол» футболчилари август ойидан бери Чемпионлар Лигасида ва чемпионатда тинимсиз ўйнаб келишади ва август ойидан ҳозирги кунгача ҳар уч ёки тўрт кунда бир ўйнашади.

“Демак, энг аҳамиятлиси – бу жисмоний ҳолатни тиклашдир. Икки кун ичида жисмоний ҳолатни керакли меъёрга келтириш иложсиз бўлади”.

“Кўриб турганингиздек, улар яхши формада бўлганда, прессинг қўллашади ва жуда тажовузкор ўйнашади. Гол ўтказиб юборганимиздан сўнг, ўйинни олдиндагидек давом эттира олмадик ва яна гол ўтказиб юбордик ва бу ўйинни ўзгартириб юборди”.