Kun.uz: 2018 йили Россияда бўлиб ўтадиган жаҳон чемпионати учун Самарада бунёд этилаётган стадионга « Cosmos Arena» номи берилади. Бу ҳақда «ТАСС» ахборот агентлиги минтақавий ҳукумат матбуот хизмати маълумотларига таяниб хабар бермоқда.
«ЖЧ-2018га тайёргарлик кўраётган ишчи гуруҳнинг йиғилишида стадионга ном танлашда турли талқинларни билдиришди. Улар орасида «Самара Арена», «Королёв Арена», «Волга Арена», «Жигули Арена» каби вариантлар бор эди. Бироқ кўпчилик қатнашчилар «Cosmos Arena» номини маъқул кўришди», дея қайд қилинади матбуот хизмати хабарида.
45 минг томошабинга мўлжалланган ушбу стадион қурилиши 2014 йилнинг июль ойида бошланган ва ҳозирда белгиланган график асосида тўхтовсиз иш жараёни кетмоқда. Ушбу спорт объекти 2017 йилнинг 15 декабрида фойдаланишга топширилиши режалаштирилган бўлиб, лойиҳа қиймати 13,4 млрд рублни ташкил қилади.
