Хорватиянинг энг етакчи футбол жамоаси бўлмиш Загребнинг "Динамо" жамоаси президенти Здравко Мамич ҳибсга олинди. Бу ҳақда АР хабар берган.
Хабарда айтилишича, у коррупция жиноятларини амалга оширишда ва солиқларни тўламаганликда айбланган.
Маълум қилинишича, Мамични тегишли органлар ёз фаслидан бери кузатиб келишаётганди.
У ўтган вақт ичида бир неча марта сўроқ қилиш учун чақирилганди. Эндиликда эса иш қамоққа олишгача бориб етган.
Ҳуқуқ тартибот органларининг гумон қилишича, Мамич бир неча ҳамтовоқлари билан трансферлар сиёсатида қаллобликка қўл урган.
"Динамо" жамоаси офисида тинтувлар ўтказилган.
Маълумот учун, Загребнинг "Динамо" жамоаси айни вақтда ЕЧЛда иштирокини давом эттирмоқда.
Пойтахт жамоаси Хорватия чемпионатининг жорий мавсумида 16 турдан кейин 30 очко тўплаган ҳолда иккинчи ўринда бормоқда.
1945 йилда ташкил топган клуб ўз вақтида Югославия чемпионатининг совриндор жамоаларидан бири бўлган. Мамлакат алоҳида ажралиб чиққанидан буён "Динамо" 12 марта Хорватия чемпиони бўлган. Жамоа 10 йилда чемпионликни бошқа жамоага бермай келмоқда.
