"Marka" nashrining sobiq muharriri va taniqli ispaniyalik jurnalist Eduardo Inda ma’lumot berishicha, "Barselona" "Betis"ga qarshi o‘yindan keyin samolyotda qaytish chog‘ida Jerar Pike va Lionel Messi klubning ayrim rahbarlariga nisbatan keskin munosabatda bo‘lishgan. Bu o‘yinda to‘p darvoza chizig‘ini kesib o‘tganiga qaramay, hakam golni inobatga olmagandi.

Jerar Pike "ko‘k-anorranglilar" rahbariyati tomon keskin fikr bildirgan. Jumladan, futbolchining fikricha, hakamlar "Barsa"ga nisbatan chiqargan adolatsiz qarorlari muhokama qilingan vaziyatda klub rahbariyati jamoani yetarlicha qo‘llab-quvvatlamagan.

"Betis" – "Barselona" o‘yinida inobatga olinmagan gol va berilmagan penalti tufayli Neymar hakamning ustidan kulgan.

"Sizlar e’tiroz bildirmadingiz, o‘yindan keyin hech narsa demadingiz. Oldinda "Atletiko"ga qarshi bahs kutib turibdi. Unda ham hakamlar bilan bog‘liq muammoga duch kelishimiz mumkin. Shunda ham sukut saqlaysizlarmi, shunda ham murabbiyga (Luis Enrike) jim bo‘lishni ta’kidlaysizmi?", – degan Pike klub rahbarlariga.

Pikening bunday hujumiga javoban "Barselona" xo‘jayinlari bundan keyin safar o‘yinlariga jamoa bilan bir samolyotda uchmasliklarini aytishgan.