"Марка" нашрининг собиқ муҳаррири ва таниқли испаниялик журналист Эдуардо Инда маълумот беришича, "Барселона" "Бетис"га қарши ўйиндан кейин самолётда қайтиш чоғида Жерар Пике ва Лионель Месси клубнинг айрим раҳбарларига нисбатан кескин муносабатда бўлишган. Бу ўйинда тўп дарвоза чизиғини кесиб ўтганига қарамай, ҳакам голни инобатга олмаганди.

Жерар Пике "кўк-анорранглилар" раҳбарияти томон кескин фикр билдирган. Жумладан, футболчининг фикрича, ҳакамлар "Барса"га нисбатан чиқарган адолатсиз қарорлари муҳокама қилинган вазиятда клуб раҳбарияти жамоани етарлича қўллаб-қувватламаган.

"Бетис" – "Барселона" ўйинида инобатга олинмаган гол ва берилмаган пенальти туфайли Неймар ҳакамнинг устидан кулган.

"Сизлар эътироз билдирмадингиз, ўйиндан кейин ҳеч нарса демадингиз. Олдинда "Атлетико"га қарши баҳс кутиб турибди. Унда ҳам ҳакамлар билан боғлиқ муаммога дуч келишимиз мумкин. Шунда ҳам сукут сақлайсизларми, шунда ҳам мураббийга (Луис Энрике) жим бўлишни таъкидлайсизми?", – деган Пике клуб раҳбарларига.

Пикенинг бундай ҳужумига жавобан "Барселона" хўжайинлари бундан кейин сафар ўйинларига жамоа билан бир самолётда учмасликларини айтишган.