«Барселона» яқин орада йирик трансферни амалга ошириши мумкин. Каталонияликлар ярим ҳимоячи Родрини ўз сафларига қўшиб олиш курашида «Реал»ни ортда қолдирмоқчи. The Touchline нашрининг Sport журналисти Карлос Монфортга таяниб хабар беришича, «Барселона» бош мураббийи Ханс-Дитер Флик Родрига шахсан қўнғироқ қилиб, «кўк-анорранглилар» лойиҳасини тушунтирган ва хавбекни клубга ўтишга кўндиришга ҳаракат қилган.
Қайд этилишича, ушбу қўнғироқ вазиятни ўзгартирди: Родри «Реал» билан музокараларда силжиш бўлмаганидан сўнг, эндиликда «Барселона»га ўтиш вариантига очиқ.
Родри билан клуб ҳақида «Барселона» футболчилари, жумладан Ламин Ямал ҳам гаплашган. Ўйинчилар 30 ёшли хавбекни «Камп Ноу»га кўчиб ўтиш имкониятини кўриб чиқишга чақиришган.
Ҳозирда Родри барча вариантларни чамалаб кўрмоқда. «Барселона» эса битимнинг молиявий масалаларини ҳал қилишга ўтишдан олдин аниқ жавоб олишни истайди.
Родрининг «Манчестер Сити» билан амалдаги шартномаси 2026/2027 йилги мавсум охиригача мўлжалланган.
