«Barselona» yaqin orada yirik transferni amalga oshirishi mumkin. Kataloniyaliklar yarim himoyachi Rodrini o‘z saflariga qo‘shib olish kurashida «Real»ni ortda qoldirmoqchi. The Touchline nashrining Sport jurnalisti Karlos Monfortga tayanib xabar berishicha, «Barselona» bosh murabbiyi Xans-Diter Flik Rodriga shaxsan qo‘ng‘iroq qilib, «ko‘k-anorranglilar» loyihasini tushuntirgan va xavbekni klubga o‘tishga ko‘ndirishga harakat qilgan.
Qayd etilishicha, ushbu qo‘ng‘iroq vaziyatni o‘zgartirdi: Rodri «Real» bilan muzokaralarda siljish bo‘lmaganidan so‘ng, endilikda «Barselona»ga o‘tish variantiga ochiq.
Rodri bilan klub haqida «Barselona» futbolchilari, jumladan Lamin Yamal ham gaplashgan. O‘yinchilar 30 yoshli xavbekni «Kamp Nou»ga ko‘chib o‘tish imkoniyatini ko‘rib chiqishga chaqirishgan.
Hozirda Rodri barcha variantlarni chamalab ko‘rmoqda. «Barselona» esa bitimning moliyaviy masalalarini hal qilishga o‘tishdan oldin aniq javob olishni istaydi.
Rodrining «Manchester Siti» bilan amaldagi shartnomasi 2026/2027 yilgi mavsum oxirigacha mo‘ljallangan.
