Родрининг «Реал»га трансфери барбод бўлганининг янги тафсилотлари маълум бўлди.
Журналист Серхио Валентиннинг маълумотига кўра, Мадрид клуби испаниялик футболчи билан шартнома имзолашга жуда яқин эди, бироқ битим клуб раҳбариятининг трансфер нархини пасайтиришга уриниши сабабли барбод бўлган. Манбанинг таъкидлашича, «Реал» Родрининг ўзи билан аллақачон келишувга эришган ва «Манчестер Сити» билан ҳам битим тузишга яқин келиб қолган эди. Аммо клуб бош скаути Хуни Калафат аралашувидан сўнг, президент Флорентино Перес нархни туширишга эришиш умидида музокараларни вақтинча тўхтатиб туришга қарор қилган.
Қайд этилишича, Англия клуби молиявий шартларни ўзгартиришдан бош тортган. «Реал» битимни пайсалга солиб турган бир вақтда, ярим ҳимоячи учун курашга «Барселона» қўшилган. Манбага кўра, Каталония клуби спорт директори Деку, бош мураббий Ханс-Дитер Флик ва Родрининг Испания терма жамоасидаги бир нечта шериклари футболчи билан музокара ўтказиб, уни каталонияликлар лагерига ўтишга кўндиришган.
