Мадриднинг «Реал» клуби таркибини кучайтириш мақсадида Англия Премьер-лигасида тўп сураётган футболчилардан бирини ўз трансфер рўйхатига киритди.

TUTTOmercatoWEB нашрининг хабар беришича, Испания гранди «Борнмут» ярим ҳимоячиси Алекс Скоттнинг ўйинларини диққат билан кузатиб бормоқда.

Манбага кўра, мадридликлар 23 ёшли англиялик футболчини ўз сафига қўшиб олиш имкониятини ўрганмоқда. Бироқ эҳтимолий трансферни амалга ошириш осон бўлмаслиги мумкин. Сабаби, «Борнмут» ўз футболчисини тахминан 120 миллион еврога баҳоламоқда.

Шунга қарамай, «Реал» Скоттга бўлган қизиқишини сақлаб қолмоқда ва унинг трансферини амалга ошириш вариантини кўриб чиқмоқда.

Жорий мавсумда англиялик ярим ҳимоячи барча мусобақалар доирасида олтита учрашувда майдонга тушиб, битта гол урди ва иккита голли узатмани амалга оширди.

Алекс Скоттнинг «Борнмут» билан амалдаги шартномаси 2028 йилнинг июнь ойи охирига қадар мўлжалланган.