«Барселона» мавсумни кетма-кет 11 та ғалаба билан бошлаганди. Бироқ кейин жамоа Чемпионлар лигасида «ПСЖ»га (2:4), Испания чемпионатида эса «Реал»га (1:2) мағлуб бўлди. Албатта, бу натижалар футболчилар ва мухлисларнинг кайфиятига таъсир қилди.

Испаниянинг Sport нашрига таяниб, Barca Universal хабар беришича, чоршанба куни «Барселона» сардорлари гуруҳи бутун жамоа учун барбекю ташкил этишга қарор қилди. Футболчилар клуб базасида гўшт пиширишди.

Тадбирдан кўзланган мақсад — кетма-кет қайд этилган икки мағлубиятдан кейин жамоадаги бирдамликни мустаҳкамлаш.

Маълум бўлишича, «Барселона» футболчилари душанба ва сешанба кунлари машғулот ўтказмаган.

Каталонияликларнинг навбатдаги учрашуви 31 октябрь куни бўлиб ўтади. Ҳанс-Дитер Флик шогирдлари ўз майдонида «Алавес»ни қабул қилади.