Rodrining «Real»ga transferi barbod bo‘lganining yangi tafsilotlari ma’lum bo‘ldi.

Jurnalist Serxio Valentinning ma’lumotiga ko‘ra, Madrid klubi ispaniyalik futbolchi bilan shartnoma imzolashga juda yaqin edi, biroq bitim klub rahbariyatining transfer narxini pasaytirishga urinishi sababli barbod bo‘lgan. Manbaning ta’kidlashicha, «Real» Rodrining o‘zi bilan allaqachon kelishuvga erishgan va «Manchester Siti» bilan ham bitim tuzishga yaqin kelib qolgan edi. Ammo klub bosh skauti Xuni Kalafat aralashuvidan so‘ng, prezident Florentino Peres narxni tushirishga erishish umidida muzokaralarni vaqtincha to‘xtatib turishga qaror qilgan.

Qayd etilishicha, Angliya klubi moliyaviy shartlarni o‘zgartirishdan bosh tortgan. «Real» bitimni paysalga solib turgan bir vaqtda, yarim himoyachi uchun kurashga «Barselona» qo‘shilgan. Manbaga ko‘ra, Kataloniya klubi sport direktori Deku, bosh murabbiy Xans-Diter Flik va Rodrining Ispaniya terma jamoasidagi bir nechta sheriklari futbolchi bilan muzokara o‘tkazib, uni kataloniyaliklar lageriga o‘tishga ko‘ndirishgan.