Portugaliya terma jamoasi bosh murabbiyi Jorje Jezush Millatlar ligasida Norvegiyaga qarshi o‘yinda Krishtianu Ronalduni maydonga tushirmagani haqida fikr bildirdi.

Portugaliya safarda 2:1 hisobida g‘alaba qozondi. Joau Feliks 17-daqiqada, Gonsalu Ramush esa 54-daqiqada gol urdi. Norvegiya safida Erling Xoland 51-daqiqada o‘z nomini tabloga yozdirdi. 41 yoshli Ronaldu esa butun uchrashuvni zaxira o‘rindig‘ida o‘tkazdi.

«Bu o‘yinda Ronalduni maydonga tushirish uchun mos payt bo‘lmadi. Bu taktik qaror edi. Menga boshqacha sifatlarga ega futbolchi kerak bo‘ldi. Biroq Krishtianu Daniyaga qarshi o‘yinda maydonga tushishi mumkin», — deya Jezushning so‘zlarini The Touchline keltirdi.

Daniya — Portugaliya uchrashuvi 1 oktyabr, payshanba kuni bo‘lib o‘tadi.