2008 yilning 10 sentyabrida O‘zbekiston milliy terma jamoasi Toshkentda JCH-2010 saralashi doirasida Avstraliya bilan kuch sinashib, 0:1 hisobida imkoniyatni boy bergandi. Mazkur mag‘lubiyatdan keyin terma jamoa bosh murabbiyi Rauf Inileev o‘z vazifasidan ozod qilinib, uning o‘rnini Mirjalol Qosimov egalladi.

Yangi murabbiy jamoada 14ta o‘yin o‘tkazdi va Osiyo chempionati saralashidagi BAA termasiga qarshi o‘yin poytaxtimizda boy berilgach (0:1), Qosimov ham ishdan olindi. Shu tariqa, terma ustozligiga barchamizga yaxshi tanish Vadim Abramov keldi. Abramov jamoa boshqaruvini qo‘lga olgach, futbolchilarimizni 28 marta maydonga olib chiqdi. Ammo ko‘ngilsiz natija bilan tugagan birgina o‘yin, aniqroq aytsak, JCH-2014 yo‘lidagi Eronga boy berilgan bahs (0:1) Abramovning iste’fosi bilan yakunlandi. Taqdirni qarangki, Vadim Abramovdan so‘ng terma bosh murabbiyi lavozimi yana Mirjalol Qosimovga ishonib topshirildi.

Jamoa boshqaruvini ikkinchi marta qo‘lga olgan Qosimov murabbiylik kursisida bu gal 41ta rasmiy uchrashuv o‘tkazdi va bu borada 55 o‘yinlik rekord o‘rnatdi. Ammo JCH-2018 saralashida Pxenyanda KXDR termasidan qabul qilib olingan 2:4 hisobidagi mag‘lubiyat Mirjalolni yana iste’foga chiqarilishiga sabab bo‘ldi. Endi uning o‘rnini «Paxtakor» ustozi Samvel Babayan egalladi.

Biz yuqorida sanab o‘tgan uch murabbiy O‘zbekiston terma jamoasiga jami 100 o‘yinda ustozlik qilishdi. Bu son esa statistika jihatidan olib qaralsa, kishida qiziqish uyg‘otadi. Shunday ekan, quyida futbol ixlosmandlariga ikkita jadvalni taqdim etishni lozim topdik. Ularda uch murabbiy - Mirjalol Qosimov, Vadim Abramov va Samvel Babayanlarning terma jamoa ustozi sifatidagi ko‘rsatkichlari berilgan.

Jadvallarda o‘tkazilgan o‘yinlarning 2017 yil 1 yanvar holatigacha bo‘lgan natijalari bayon qilingan. Boshqacha aytsak, termamizning M.Qosimov rahbarligidagi 156-raqamli o‘yinidan boshlab, toki Samvel Babayan boshqaruvida o‘tgan 255 o‘yinigacha.

Birinchi jadvalda o‘yinlar uy va safar tizimida berilgan. Qizig‘i shundaki, Qosimovning birinchi murabbiylik davrida ko‘rsatkichlar bir xil: uyda ham, safarda ham 7tadan o‘yin, 2 tadan g‘alaba, 2 tadan durang, 3 tadan mag‘lubiyat. Urilgan va o‘tkazib yuborilgan gollar orasida ham farq katta emas: uyda 7 - 4, safarda 6 - 9.

Abramovda esa safarda o‘tkazilgan o‘yinlar soni hayratlanarli: u jami 28 uchrashuvning atigi 5tasini uyda o‘tkazgan, xolos.

Abramovning ham, Babayanning ham uydagi yagona muvaffaqiyatsizligiga bir jamoa - Eron termasi sababchi bo‘lgan.

Darvoqe, birinchi jadvalda e’tiborga molik yana bir omil bor - bir o‘yin Olmaliq shahrida bo‘lib o‘tgan.

Ikkinchi jadvaldagi o‘yinlar esa uch guruhga ajratilgan: JCH saralashlari, Osiyo chempionati saralashi va final bosqichlari, o‘rtoqlik uchrashuvlari.

E’tibor bersak, JCH saralashlarida hammadan ko‘proq Qosimov faoliyat ko‘rsatgan - 14 o‘yin (5 g‘alaba, 3 durang va 6 mag‘lubiyat).

Mundial saralashida ko‘roq Abramovga omad kulib boqqan - 9 o‘yin (7 g‘alaba, bir durang va bir mag‘lubiyat). Lekin xuddi shu yagona omadsizlik Abramovning ishdan olinishi bilan yakunlandi.

Yana bir nechta diqqatga molik jihatlar:

- Abramov o‘rtoqlik o‘yinlarida juda muvaffaqiyatsiz faoliyat yuritgan: bir g‘alaba, uch durang va 9 mag‘lubiyat.

- Qosimovning Osiyo kubogidagi natijalari qoniqarli: 8 g‘alaba, 4tadan durang va mag‘lubiyat. To‘plar nisbati 24 - 14, demak, Q 10.

- Shuningdek, Abramovning qit’a chempionatidagi natijalari ham qoniqarli: uch g‘alaba, bir durang, ikki mag‘lubiyat. E’tiborlisi, hal qiluvchi o‘yinlarda  Vadim Karlenovichning omadi chopmagan: Avstraliya (0:6) va Janubiy Koreya (2:3). To‘plar nisbati 10-13 ko‘rinishida. Ammo adolat yuzasidan aytish lozim, aynan Abramov boshqaruvidagi terma qit’a chempionatida yarim finalgacha yetib bordi va bu hozircha Osiyodagi eng yaxshi natijamiz bo‘lib turibdi.

Samvel Babayaning esa JCH-2018 saralashidagi ko‘rsatkichlari yaxshi: 9 g‘alaba va ikki mag‘lubiyat.

Mirjalol Qosimov - o‘tkazilgan rasmiy o‘yinlar soni bo‘yicha yaqqol rekordchi - 55 uchrashuv, ikkinchi o‘rindagi Vadim Abramov hisobida 28 bahs bor. Bu ko‘rsatkich Rauf  Inileevda 27ta, Ravshan Haydarovda 25ta, Vladimir Salkovda 21, Samvel Babayan hisobida ham hozirgacha 18 uchrashuv mavjud. Darvoqe, termamizning ilk ustozi - Rustam Akramovda ham aynan 18ta o‘yin bo‘lgan.              

Imkoniyatdan foydalanib, bir omilga urg‘u qaratmoqchiman. Men O‘zbekiston terma jamoasining natijalarini 1992 yildan beri hisoblab kelaman va TJMdan bu statistik ma’lumotlarga aniqlik kiritishni so‘rardim. Agar lozim bo‘lsa, hisoblarimga tuzatish kiritish kerak. Bu esa o‘z navbatida, futbol ixlosmandlarini mavhumlikdan, chalkashliklardan xalos qilardi. Qolaversa, terma ishtirokidagi har bir rasmiy o‘yin tartib raqami bilan belgilanib borilishi tarafdoriman. Mening hisob-kitoblarimga ko‘ra, shu kungacha termamiz (Gruziya bilan o‘tgan o‘yinni hisoblaganda) hisobida 256 uchrashuv bor.

Bugungi voqeliklarga kelsak, Rossiyada o‘tadigan JCH-2018 saralashining so‘nggi bosqichida guruhimizdagi raqiblarning kuchi teng. Albatta, qaysidir jamoalar (Eron, Janubiy Koreya) boshqalardan ozgina kuchliroqdek. Harqalay, jamoamizga aynan shu raqiblarga qarshi o‘yinlarda omad yetishmayapti.

Futbol muxlislari, aniqrog‘i, futboldagi raqamlarning ixlosmandlari biz keltirgan jadvallardan foydalanib, fikr yuritishlari mumkin. Zero futbol  statistikasi tarixda birinchi gol urilgan damdan beri yuritiladi va raqamlardagi hayratlanarli ko‘rsatkichlar, qiziqarli natijalar millionlar o‘yiniga bo‘lgan qiziqishni yanada orttirmoqda. O‘zbekistonlik ishqibozlar esa shu paytgacha JCHlarning beshta saralashiga guvoh bo‘lishdi: 1998, 2002, 2006, 2010, 2014. Achinarlisi, bu besh jarayonning har birida termamiz borasidagi orzular ushalishiga nimadir xalaqit qilaveradi. O‘ylashimizcha, bu «qora an’ana»ga chek qo‘yadigan payt keldi. Zero bugun termamizda mundialga chiqish uchun har qachongidan-da yaxshiroq imkoniyatlar mavjud. Bir so‘z bilan aytganda, biz albatta, Rossiyaga boramiz!