“Andijon” klubi seleksiya ishlarini qizg‘in davom ettirmoqda. Jamoa o‘z safiga yana ikki tajribali futbolchini o‘z safiga qo‘shdi — himoyachi Igor Golban va darvozabon Rahimjon Davronov bilan shartnoma imzolandi.

Tajribali markaziy himoyachi Igor Golban 2026-yilgi mavsumda “Andijon” sharafini himoya qiladi. 1990-yil 31-iyulda Rossiyaning Sochi shahrida tug‘ilgan futbolchi faoliyatini vatanining turli klublarida boshlagan. U “Jemchujina”, “Sochi”, “Lokomotiv”, “Shinnik”, “Ximki”, shuningdek Chexiyaning “Sigma” jamoasida to‘p surgan.

Golban 2015-yildan buyon O‘zbekiston chempionatida faoliyat yuritib kelmoqda. U shu paytgacha “Qo‘qon-1912”, “Navbahor” va “Nasaf” tarkiblarida o‘ynagan, mamlakat chempioni bo‘lgan va ikki karra Superkubok sohibiga aylangan. Umumiy hisobda 420 ta o‘yinda ishtirok etib, 27 ta gol urgan va 8 ta golli pas bergan.

Klubning yana bir yangi transferi — tajribali darvozabon Rahimjon Davronov. U o‘tgan mavsumni “Lokomotiv” safida o‘tkazib, jamoaning Superliga yo‘llanmasi olishida muhim rol o‘ynadi. 1996-yil 3-oktyabrda Muborakda tug‘ilgan Davronov faoliyatini “Mash’al”da boshlagan. Keyinchalik “Buxoro”, “Navbahor”, “Turon”, “Metallurg” va “Lokomotiv” jamoalari darvozasini qo‘riqlagan. Joriy yil “Loko” tarkibida 23 ta o‘yinda maydonga tushdi. U o‘z vaqtida O‘zbekiston U23 tarkibida Osiyo chempioni ham bo‘lgan.