“Navbahor” – “Neftchi” uchrashuvidan keyin o‘tkazilgan matbuot anjumanida “Navbahor” bosh murabbiyi Ilhom Mo‘minjonov ishtirok etib, OAV vakillarining savollariga javob qaytardi.
"O‘yin haqida gap ketganida raqibning dastlabki va butun bahs davomidagi yagona burchak to‘pidan keyin o‘z darvozamizdan to‘p o‘tkazib yubordik. O‘sha vaziyatda futbolchilarimiz bir muddatga diqqat e’tiborni yo‘qotib, oxirigacha o‘ynay olishmadi. Bu esa hisobni ochilishiga sababchi bo‘ldi. “Vodiy derbi”siga jiddiy tarzda tayyorgarlik ko‘rgandik. “Neftchi”ning har bir chiziqda namoyish etadigan o‘yinini maxsus tayyorlangan videorolik orqali jamoamiz a’zolari bilan birgalikda ko‘rib chiqqandik. Bugun hujumda sovuqqonlik bilan harakat qilish yetishmadi. Bundan tashqari biroz omadimiz ham chopmadi. Raqib darvozasi oldidan bir nechta xavfli vaziyatlarni yuzaga keltirdik. Yigitlarga dastlabki 15 daqiqada tezkor gol urishga intilishlari kerakligini aytib o‘tgandim. Futbolchilarimiz maydonda Navoiyda “Qizilqum”ga qarshi kechgan bahsdagi kabi to‘p surishgani uchun ularga rahmat aytaman. Iroda namoyish etib, durangni ta’minlashni uddasidan chiqishdi. Uchrashuv yakunlanishiga 5-6 daqiqa qolganida g‘alabani ilib ketish maqsadida to‘pni oldinga tepib, gol urishgani uchun o‘yinimiz biroz o‘xshamadi. Qolgan vaqt davomida esa asosan to‘pni bir-birlariga aniq oshirish orqali o‘yin ko‘rsatishgandi. Hujumdagi harakatlarimizda biroz oqsoqlik kuzatilmoqda. Aynan shu sababli durang bilan cheklanishga majbur bo‘ldik. Mashg‘ulotlarda bu kabi xato va kamchiliklarni bartaraf etish ustida ish olib boramiz. Ortda qolgan uchta turda Saidov, G‘ofurov va Komilov kabi hujum chizig‘ida to‘p surmaydigan futbolchilar gol urishdi. Shu sababli hujumchilarimizdan gol talab qilaman. Bugun Yovanovich penaltidan gol urgan bo‘lsada uni o‘yindan gol urishini istayman. O‘z navbatida himoyada ham kamchiliklar mavjud. Maqsadimiz har bir uchrashuvda o‘z darvozamiz daxlsizligini ta’minlashdan iborat. Lekin, ortda qolgan uchta o‘yinda to‘rtta gol o‘tkazib yubordik. Uchta turda gol urishga erishgan bo‘lsakda, hujumchilarimizni ham gol mualliflari bo‘lishini xohlayman. Yovanovichni 2016 yilgi chempionatda namoyish etgan o‘yinlari uchun jamoaga taklif etgandik. Hujumchimiz 3-turda dastlabki golini urishga erishdi. Yanada jiddiy tarzda ishlab natijalarimizni yaxshilashga e’tibor qaratamiz. Har bir o‘yin biz uchun juda muhim. Tarkibga shu sababli tajribali futbolchilarni jalb etganmiz. Navbatdagi turdagi raqibimiz uchta turda yuz foizlik natijani qayd etishga erishdi. Qanday holat bo‘lishidan qat’iy nazar “Dinamo”ga qarshi o‘yinda faqat g‘alaba uchun maydonga tushamiz. Hattoki, durang natija ham bizni qoniqtirmaydi. Chunki ortga endi yo‘l yo‘q. Ro‘zimboy Ahmedov betob bo‘lganligi sababli mashg‘ulotlarda qatnasha olmadi. Ayni paytda to‘liq sog‘ayib ulgurmaganligi sababli, bugun uni qaydnomaga kiritilmadi. Hujumchimizni yo‘qligi ham bugun bilindi" - dedi Mo‘minjonov.
