Malayziya poytaxti Kuala-Lumpur shahrida bugun, 4 aprel kuni Osiyo futbol konfederasiyasi (OFK)ga a’zo mamlakat federasiya (assosiasiya)lari bosh kotiblari konferensiyasi start oldi.
Birinchi bor tashkil qilinayotgan mazkur konferensiyada O‘zbekiston futbol Federasiyasi Bosh kotibi Sardor Rahmatullayev ham ishtirok etmoqda. Uch kun davom etadigan tadbirni o‘tkazishdan asosiy maqsad OFKga a’zo mamlakat federasiyalari o‘rtasida fikr va g‘oya almashish, hamkorlik va birdamlikni oshirishdan iborat.
OFK Bosh kotibi Dato Uindsor Jon bu kabi konferensiyani o‘tkazish muhim ekanini hamda Osiyo futboli vazifalarini yaxshiroq tushunishga yordam berishini ta’kidladi.
“Mazkur tadbir OFKning o‘z maqsad va vazifalariga bo‘lgan majburiyatini bajarishga hamda tashkilotga a’zo mamlakat federasiyalarini qo‘llab-quvvatlashga tayyor ekaniga yaqqol misol bo‘la oladi. Maqsadimiz – dunyodagi yetakchi konfederasiyaga aylanib, jamoalarimizning yuqori darajada o‘ynashiga yordam berish. OFKga a’zo mamlakat federasiyalari bosh kotiblarini Kuala-Lumpurda yig‘ish orqali futbolning Osiyodagi vazifalarini yaxshiroq tushunish va qo‘llab-quvvatlashga ko‘mak beradigan muhit yarata oldik”, – dedi Dato Uindsor Jon.
