OCHL–2017 turniri “A” guruhi 4-turidan o‘rin olgan “Lokomotiv” – “Istiqlol” (1:1) urashuvidan keyin tashkil etilgan matbuot anjumanida mehmonlar bosh murabbiyi Alirizo Mansurian ishtirok etib, uchrchashuv borasida o‘z fikrlari bilan o‘rtoqlashdi.

“Birinchi bo‘limda “Lokomotiv” juda yaxshi o‘ynadi va bu bizni hayratga soldi. Raqib dastlabki 15 daqiqa ichida yaxshi o‘yin namoyish qilib, birinchi golni urishga muvaffaq bo‘ldi. Ikkinchi bo‘limda o‘zimizga kelib, vaziyatlar yarata boshladik. Jismoniy tomondan “Lokomotiv”dan ustun kelganimiz tufayli hisobni tenglashtirishga erishdik. Gol urganimizdan keyin hisobni oshirishimiz mumkin edi, bunday imkoniya raqibda ham bor edi. Ammo o‘yin durang bilan tugadi. O‘yinchilarimning xatti-harakatidan mamnunman.

Guruhdagi vaziyatga kelsak, bu OCHL guruh bosqichidagi eng qiyinlaridan biri. Ayni vaqtda barcha jamoalarda keyingi bosqichga chiqish uchun imkoniyat bor. Qolgan 2 o‘yinda ehtiyotkorona harakat qilib, har ikkisida ham g‘alaba qozonishga harakat qilamiz.

Raqibni yaxshi o‘rganganmiz va standart vaziyatlarga tayyorgarlik ko‘rganmiz. Biroq omad bizdan yuz o‘girdi. Tehrondagi o‘yinda “Lokomotiv”ga standart vaziyatdan gol urgandik. “Al-Taavon” ham “Lokomotiv”ga standart vaziyatdan gol urgandi. Ammo bugun omad biz tomonda emasdi.

Bugungi o‘yinda 1 ochko oldikmi yoki 2 ochko yo‘qotdikmi? Bu savolga aniq javob bera olmayman. O‘yindan kelib chiqsak, 1 ochko oldik, shu bilan birga 2 ochko ham yo‘qotdik. Chunki o‘yin yakunida g‘alaba qozonishimiz ham mumkin edi. Takrorlayman, bu savolga aniq javobim yo‘q”, – dedi Alirizo Mansurian.