Toshkentning «Bunyodkor» klubi Chempionlar ligasining guruh bosqichi yakuniga 2 ta tur qolganiga qaramay, undan chiqish imkoniyatlarini to‘la yo‘qotib bo‘ldi.

4-turni Eronda «Zob Ohan» klubiga qarshi o‘tkazgan «qaldirg‘ochlar» 1:2 hisobida yengildi. Tomonlarning Toshkentdagi o‘yini forslarning 2:0 hisobidagi g‘alabasi bilan yakuniga yetgandi.

Shu tariqa «Bunyodkor» qatorasiga uchinchi bor guruh bosqichidan o‘ta olmadi. Ularning barchasida Sergey Lushchan jamoaga ustozlik qilgandi.

Ma’lumot uchun, «Bunyodkor» 2008 yilgi mavsumdan boshlab OCHL guruh bosqichida uzluksiz ishtirok etadi va Lushchan murabbiyligiga qadar ularning hammasida guruh o‘yinlarini muvaffaqiyat bilan yakunlay olgan.