Seshanba kuni bo‘lib o‘tgan «Yuventus» - «Barselona» o‘yini (3:0)da Paulo Dibala «dubl» qayd etib, bosh qahramon bo‘lgandi. Ertasiga Kilian Mbappe («Monako») va Krishtianu Ronaldu («Real») ham shunday karomat ko‘rsatishdi. Xullas, 1|4 final doirasidagi dastlabki o‘yinlarning 3tasida chinakam qahramon ko‘zga tashlandi.
*** «Real» himoyachisi Serxio Ramos CHL tarixida 100ta o‘yin marrasiga yetgan 30-futbolchi bo‘lishga yaqin. Ispaniyalik chin sardor «Bavariya»ga qarshi birinchi bahsda to‘liq vaqt harakatlandi. Bu uning uchun asosiy yevrokubok turniridagi 99-uchrashuv edi. Demak, Serxio bugun Madriddagi javob bahsida yubiley - 100-o‘yinini nishonlashi mumkin.
*** «Bavariya» - «Real» o‘yini taqdirini hal qilgan Krishtianu Ronaldu CHLning o‘tgan haftadagi eng yaxshi futbolchisi sifatida tan olindi. U maxsus so‘rovda 57 foiz ovoz to‘plab, «Yuventus» hujumchisi Paulo Dibala (33 foiz) va «Monako» «durdona»si Kilian Mbappe (6 foiz)ni ortda qoldirdi.
*** «Atletiko» chorak finalning ilk o‘yinida o‘z darvozasi daxlsizligini saqlab qoldi. CHL «pley-off» raundlarini hisobga olsak, «matraschilar» shu bilan o‘z maydonlaridagi ketma-ket 9ta uchrashuvda raqiblarga gol urish imkoniyatini berishmadi.
*** «Monako» yarim himoyachisi Kilian Mbappe CHL tarixida «pley-off» raundlarida «dubl»ga erishgan eng yosh futbolchi maqomini oldi. U Dortmundda «Borussiya» darvozasiga 2ta gol urgancha muxlislar bilan to‘lgan tribunalarni sukut saqlashga majbur etgan oqshom 18 yoshu 133 kunlik edi. Umuman, fransiyalik o‘smir yigit joriy mavsum «Monako» uchun barcha turnirlarda urgan gollari sonini 21ta (34ta o‘yinda)ga yetkazib qo‘ydi.
*** «Monako» himoyachisi Fabinyo «Borussiya»ga qarshi o‘yinning 17-daqiqasida penaltidan foydalanolmadi. Aniqrog‘i, 23 yoshli braziliyalik ijrosidagi zarba noaniq chiqdi. E’tiborlisi, Fabinyo bungacha barcha turnirlar doirasida ketma-ket 15ta penaltini muvaffaqiyatli amalga oshirgandi. Umuman, u «Monako»ning o‘yinida 11 metrli jarima zarbasini birinchi marta ko‘kka sovurdi.
*** Portugaliyalik 32 yoshli Krishtianu Ronaldu yevrokuboklarda 100ta gol marrasini zabt etgan birinchi futbolchiga aylandi. Buning uchun unga 143ta o‘yin kerak bo‘ldi.To‘purarlar reytingining 2-pog‘onasi «Barselona» yetakchisi Lionel Messiga tegishli - 118ta o‘yinda 97ta gol.
