Ketma-ket g‘alabalar bilan o‘zbekistonlik boks ixlosmandlariga quvonch baxsh etayotgan Boks bo‘yicha O‘zbekiston terma jamoasi vakillari Osiyo chempionatidagi o‘z yurishlarini davom ettiradi.

O‘zbekiston Sport Majmuasi mezbonlik qilayotgan ushbu chempionatning bugungi bahslari soat 12:00 da start oladi. Dastlab 40 nafar bokschi chorak final yo‘llanmasi uchun kurash olib boradi.

Shundan so‘ng, arenada tanaffus e’lon qilinadi hamda soat 18:00 dan boshlab navbatdagi 15 ta jang bo‘lib o‘tadi.

E’tiborli jihati,bugun 4 nafar hamyurtimiz ringga ko‘tariladi. Dastlab 60 kg vazn toifasida Elnur Abduraimov soat taxminan 13:50 dan boshlab (kunning 8-jang) filippinlik Jeyms Palistega qarshi jang olib boradi.

Ushbu jangdan so‘ng, terma jamoamizning yana bir vakili Shaxram G‘iyosov 69 kg vaznda doirasida iordaniyalik Ziyod Eashash bilan chorak final ostonasida jang qiladi (kunning 9-jang).

Shaxram G‘iyosov ishtirokidagi jang yakuniga yetgach tomoshabinlar boshqa mamlakatlardan tashrif buyurgan bokschilar ishtirokidagi 3 ta bahsni kuzatadilar. Va ushbu janglardan so‘ng, ringga Bektemir Meliqo‘ziyev chiqib keladi (kunning 13-jang). Bokschimiz o‘zining «temir» zarbalari bilan eronlik Amin Zyadiga «master-klass» o‘tib berishini taxmin qilish qiyin emas.

18:00 dan boshlab esa, Jasurbek Latipov (52 kg) Qirg‘iziston terma jamoasi vakili Azat Usenaliyevga bilan kurash olib boradi (kunning 21-jang).