Toshkent shahri mezbonligida o‘tgan boks bo‘yicha Osiyo Chempionatining so‘nggi kuni Xalqaro Havaskorlar Boks Uyushmasi – AIBA prezidenti Ching Kuo Vu va Osiyo Boks Konfederasiyasi prezidenti Serik Konakbayev ishtirokida matbuot anjumani o‘tkazildi.
AIBA tashkilotiga 2006 yildan buyon rahbarlik qilib kelayotgan doktor Vu boks bo‘yicha 29-Osiyo chempionati yuqori saviyada o‘tganini ta’kiladi. Mamlakatimizda jahon chempionatini o‘tkazish imkoniyati haqidagi savolga janob Vu quyidagicha javob berdi: “O‘ylashimcha O‘zbekiston bu kabi musobaqani o‘tkazish xohishini bildirsa, uning arizasi tashkilotga a’zo ko‘pchilik davlatlar tomonidan qo‘llab-quvvatlanishi mumkin”.
Eslatib o‘tamiz, yakuniga yetgan Osiyo chempionatida O‘zbekitson terma jamoasi 10ta imkoniyatdan 9ta oltin medalni qo‘lga kiritdi. Medal jamg‘arish borasidagi ikkinchi natija Qozog‘iston termasiga tegishli bo‘lib, qozog‘istonlik bokschilar turnirda 1ta oltin, 3ta kumush va 4ta bronza medali sohibiga aylanishdi. Hindiston va Mo‘g‘uliston terma jamolari esa 2tadan kumush va bronza medallar bilan uchinchi o‘rinni bo‘lib olishdi.
