Тошкент шаҳри мезбонлигида ўтган бокс бўйича Осиё Чемпионатининг сўнгги куни Халқаро Ҳаваскорлар Бокс Уюшмаси – AIBA президенти Чинг Куо Ву ва Осиё Бокс Конфедерацияси президенти Серик Конакбаев иштирокида матбуот анжумани ўтказилди.
AIBA ташкилотига 2006 йилдан буён раҳбарлик қилиб келаётган доктор Ву бокс бўйича 29-Осиё чемпионати юқори савияда ўтганини таъкилади. Мамлакатимизда жаҳон чемпионатини ўтказиш имконияти ҳақидаги саволга жаноб Ву қуйидагича жавоб берди: “Ўйлашимча Ўзбекистон бу каби мусобақани ўтказиш хоҳишини билдирса, унинг аризаси ташкилотга аъзо кўпчилик давлатлар томонидан қўллаб-қувватланиши мумкин”.
Эслатиб ўтамиз, якунига етган Осиё чемпионатида Ўзбекитсон терма жамоаси 10та имкониятдан 9та олтин медални қўлга киритди. Медал жамғариш борасидаги иккинчи натижа Қозоғистон термасига тегишли бўлиб, қозоғистонлик боксчилар турнирда 1та олтин, 3та кумуш ва 4та бронза медали соҳибига айланишди. Ҳиндистон ва Мўғулистон терма жамолари эса 2тадан кумуш ва бронза медаллар билан учинчи ўринни бўлиб олишди.
