«Манчестер Сити» ярим ҳимоячиси Тижани Рейндерс яқин вақт ичида Саудия Арабистонининг «Ал-Қодисия» клубига ўтиши кутилмоқда. Трансфер расман эълон қилинишидан олдин 28 ёшли футболчи тиббий кўрикдан ўтиши керак.

De Telegraaf маълумотига кўра, Рейндерснинг «Ал-Қодисия» билан шартномаси тўрт мавсумга мўлжалланади ва унда келишувни яна бир йилга узайтириш имконияти ҳам бўлади.

Агар футболчи шартномани тўлиқ беш йил давомида ўтказса, шу муддат ичида 100 млн евродан ортиқ маблағ ишлаб олиши мумкин.

Тижани Рейндерс «Манчестер Сити» сафида атиги бир мавсум тўп сурди. Нидерландиялик ярим ҳимоячи инглиз клуби таркибида барча мусобақалар доирасида 50 та расмий ўйинда майдонга тушиб, 7 та гол урди ва 8 та голли узатмани амалга оширди.