Konfederasiyalar kubogida bugun — 29 iyun kuni ikkinchi finalchi nomi aniq bo‘ladi. Penaltilar seriyasiga ko‘ra Portugaliya ustidan 3:0 hisobida zafar quchgan Chili termasi hal qiluvchi o‘yinda raqibini kutib turibdi.

Toshkent vaqti bilan 23:00 da Sochidagi stadionga Germaniya va Meksika termalari chiqib keladi. Nemislar mundialning amaldagi chempioni hisoblansa, meksikaliklar turnirga KONKAKAF yetakchisi sifatida yetib kelgandi.

Har ikki jamoa guruh bosqichini 7 ochko bilan yakunlashga muvaffaq bo‘ldi. Ioxim Lyov boshchilik qiladigan nemislar Chili bilan 1:1 hisobida durang o‘ynab, Avstarliyani 3:2, Kamerunni 3:1 hisobida mag‘lub etgandi.

Meksikalik futbolchilar esa Portugaliya bilan 2:2 hisobida durang o‘ynagan bo‘lsa, Yangi Zelandiya va Rossiya termalarini bir xilda — 2:1 hisobida taslim qilgandi.

Ma’lumot uchun, Rossiya mezbonligida o‘tayotgan Konfederasiyalar kubogining final o‘yini 2 iyul kuni Sankt-Peterburgda bo‘lib o‘tadi. Shu kuni 3-o‘rin egasi Moskvadagi o‘yin orqali aniqlanadi.