«Manchester Yunayted» bosh murabbiyi Joze Mourinyu International Champions Cup musobaqasi doirasida «Barselona»ga qarshi o‘yin (0:1) borasida o‘z fikrlarini bildirib o‘tdi.

«Mavsumoldi yig‘in paytida mag‘lubiyat muhim ahamiyatga ega. Mag‘lub bo‘lish hech kimga yoqmaydi, ammo mag‘lubiyat — juda muhim. Barcha o‘yinlarda («Real», «Barselona» va «Siti»ga qarshi) g‘alaba qozonib, AQSHni mag‘lubiyatsiz tark etsak biz uchun yomon bo‘lardi. Shu bois, mag‘lubiyat — bu yaxshi.

Bugun bizda yaxshi vaziyatlar ham, yomon holatlar ham bo‘ldi. Yaxshisini saqlab qolib, yomonini bartaraf etishimiz kerak.

Birinchi bo‘lim 1:0 hisobi bilan yakunlandi, lekin hisob 2:2, 3:3 yoki 4:0 bo‘lishi ham mumkin edi. Tanaffusdan keyin ko‘p o‘yinchilar almashtirildi, lekin o‘rtoqlik o‘yini bo‘lishiga qaramay, har ikkala jamoa natija uchun o‘ynadi. Biz hisobni tenglashtirishga harakat qildik, lekin raqib to‘pni yaxshi nazorat qilib, yaxshi himoyalanishdi. Hattoki, ikkinchi taymdan ham ijobiy narsalarni topish mumkin», — dedi Mourinyo.