“Barselona” klubi hujumchisi Lionel Messi Ispaniya chempionatining 5 turiga kelib, 9 ta gol urishga muvaffaq bo‘ldi. “Real” jamoasi ham mavsum boshidan beri 5 ta turda xuddi shu ko‘rsatkichni qayd etdi.
“Qirollik klubi” chempionat startida “Deportivo” (3:0) va “Sosyedad” (3:1) jamoalarini mag‘lubiyatga uchratdi. “Valensiya” (2:2), “Levante” (1:1) bilan durangga imzo chekdi. Bugun o‘rtamiyona jamoa “Betis”ga o‘z maydonida 0:1 hisobida imkoniyatni boy berdi.
Messi esa “Eybar”ga qarshi uchrashuv (6:1) da poker, “Espanyol”ga qarshi uchrashuv (5:0) da xet-trik va “Alaves”ga qarshi o‘yin (2:0) larda dubl muallifiga aylandi.
Ko‘rinib turibdiki, “Real” futbolchilarining chempionat boshidan qayd etayotgan natijalarini birgina Messining o‘zi amalga oshirmoqda.
Butun “Real” futbolchilari 9 ta gol urishgan bo‘lishsa, Messi ham shunday ko‘rsatkichga ega. Demak, nimadir qilish kerak.
Ayni paytda “Barselona” 5-turdan so‘ng umumjamoa hisobida 17 ta gol urib, 15 ochko bilan musobaqa jadvalida yetakchi bo‘lib turibdi. “Real” 8 ochko bilan 7-o‘rinda bormoqda.
Akmalxon Eshonxonov