“Metallurg” – “Qo‘qon 1912” jamoalari uchrashuvidan keyingi matbuot anjumanining ikkinchi qismida mezbonlar ustozi Rustam Mirsodiqov qatnashdi.

Rustam Mirsodiqov, “Metallurg” FK bosh murabbiyi: - “Qo‘qon 1912” jamoasi oliy ligamizda tarkibini shakllantirib olgan kuchli klublardan biri sanaladi. Shu boisdan ham o‘yinga jiddiy tayyorgarlik ko‘rdik.

Qolaversa ketma ket ikkita mag‘lubiyatdan keyin yana yutqazishga haqqimiz yo‘q edi. Futbolchilar bilan ham jismonan, ham ruhan olib borgan tayyorgarliklarimiz zoye ketmadi. Bugungi natijadan ham, o‘yindan ham qoniqish hosil qildim.

Maydonda harakat qilganlar ham, tashqarida ularga madad bo‘lib turganlar ham o‘z vazifalarini sidqidildan bajarishdi, buning uchun ularga katta rahmat. Qolaversa bizni tinimsiz qo‘llab turgan muxlislarimizga ham minnatdorlik bildiraman.

Bizning muvaffaqiyatimizda tezkor gol ham muhim ahamiyat kasb etdi. Shundan keyin futbolchilar maydonda o‘z kuchlariga ishonib, erkin o‘ynashdi. Tarkibni jamlashda qatorasiga uchinchi o‘yinda muammoga duch kelayapmiz.

Bu gal tayanch yarim himoyachimiz Ayubxon No‘’monov Namanganda olingan ikkita sariq kartochka bois maydonga tusha olmadi. Afsuski, Buxoro safariga tajribali himoyachimiz Davron Karimqulov ham bugungi ogohlantirish sababli bora olmaydi.

Ammo muammolarni bartaraf etish, tarkibdagi bo‘shliqlar ustida ishlash uchun hali vaqtimiz bor, deydi Rustam To‘xtamurodovich.