«Dinamo» - «Bunyodkor» (0:2) uchrashuvidan keyin dastlab mezbonlar bosh murabbiyi Oleg Tyulkin jurnalistlar savollariga javob qaytardi.
- Bugun murosasiz va kurashlarga boy o‘yin guvohiga aylangan bo‘lsakda, barvaqt chetlatish o‘yinimizga salbiy ta’sir qildi. Butun taym davomida 10 kishi bo‘lib o‘ynash juda og‘ir. Ayniqsa «Bunyodkor»dek jamoaga qarshi. Yigitlarga rahmat kurashishdi oxirigacha. «Bunyodkor»ni finalga chiqqani bilan tabriklayman. Muxlislarimizga yomg‘irga qaramay, o‘yin so‘nggigacha qo‘llab-quvvatlaganliklari uchun rahmat deymiz.
- Jamoa mana 12 o‘yindirki g‘alaba tugul, gol ura olmayapti. Odatda bunday paytda murabbiy iste’foga chiqariladi…
- Buni klubimiz rahbariyati hal etadi. Agar, iste’fo jamoaga yordam beradigan bo‘lsa, foydasi bo‘lsa, men ketishga tayyorman.
- Hujum chizig‘i gol ura olmayapti. Farhod Tojiyev asosiy tarkibga tushiriladi, ammo natijasiz. Nahotki, bu borada sizda tanlov yo‘q?
- Farhod Tojiyev tajribali va kuchli futbolchi. Hozirda hujumda undan kuchli futbolchi yo‘q. Tojiyev kelganidan so‘ng gol urolmayotganimizga omad yetishmayotgani sabab bo‘lmoqda. Men buni boshqacha izohlay olmayman. Harakat qilayapti, ammo natija bo‘lmayapti.
- Amirjon Safarov qizil kartochka oldi. Intizom masalasida jamoada ish olib boriladimi?
- Bugun barcha katta ishtiyoq bilan to‘p surdi, o‘yinga kuchli tayyorgarlik ko‘rgan edi. Amirjon Safarov ham to‘p uchun kurashayotganda qo‘pol o‘ynadi. U ataylab raqibga jarohat yetkazish uchun bu harakatni amalga oshirmadi, to‘p uchun o‘ynamoqchi bo‘lgan edi. Intizom masalasida ham futbolchilar harakatini ko‘rib chiqamiz, albatta.
