"Navbahor" – “Sug‘diyona” jamoalari o‘rtasida bo‘lib o‘tgan uchrashuvdan so‘ng mezbonlar bosh murabbiyi Ilhom Mo‘minjonov jurnalistlar savollariga javob qaytardi:
"Futbol - bu sport. Sport - bu natija. "So‘g‘diyona"ga qarshi o‘yinda biz kerakli natijaga erishdik. Buning uchun yigitlarga raxmat aytaman. Shogirdlarim o‘z oldilariga qo‘yilgan vazifani a’lo darajada bajarib, ishqibozlarimizni xursand qilishdi.
Kerakli ochkolarni qo‘lga kiritshda davom etamiz. Mazkur uchrashuvdan so‘ng 12 kunlik tanaffus yuzaga keladi. Biz bundan unumli foydalangan xolda "Olmaliq" va "Nasaf" jamoalariga qarshi tayyorgarlik olib boramiz.
Avvalgi matbuot anjumanlarida ham ta’kidlaganman, biz har bir uchrashuvda bor kuchimiz bilan maydonda harakat qilamiz. "Olmaliq"da iqtidorli murabbiy Viktor Kumikov ish olib bormoqda.
Ularning har bir chizig‘ida yaxshi o‘yinchilar mavjud. Ushbu jamoa ham o‘z uyida kuchli futbol namoyish qiladi. Safar bellashuvida ham ijobiy natijaga erishish uchun harakat qilamiz.
O‘rinbosarlar tarkibidan asosiy tarkibga hozirgi kunda Toshmirzayev, G‘ulomov, Yunusov va Abduvohidovlar qo‘shilishdi. Ularga katta futbolga qadam qo‘yishga ko‘maklashmoqdamiz.
Hozirgi kunda yoshlar tarkibida yosh o‘yinchilar maydonga tushishmoqda. Umid qilamanki, kelgusida Turg‘unboyev va O‘runov singari iqtidor egalari yetishib chiqadi.
Asosiy jamoaga ham o‘rinbosarlar safida asosiy tarkibda maydonga tushgan futbolchilarni jalb qilamiz", - dedi Mo‘minjonov.
