Chempionlar ligasi pley-off bosqichidagi raqibimiz haqida ma’lumotlarni taqdim etamiz.

"Al-Garafa" (2004 yilgacha "Al-Ittihod") – Doxa sharafini himoya qiladi va 1979 yil tashkil etilgan. Qatar yuqori divizioni - Yulduzlar ligasi ishtirokchisi. Ayni paytda jamoani fransiyalik mutaxassis Jan Fernades boshqarmoqda. U ilgari "Marsel", "Lill", "Nasr", "Shabab", "Vahda" kabi klublarda ishlagan. Ushbu mavsum Fernandes "Al-Xor"dan "Garafa"ga ko‘chib o‘tdi.

Tarkibda yulduz o‘yinchilardan Antonio Ximenes (CHili) va Vladimir Vayss (Slovakiya) bor.

33 yoshli Ximenes faoliyati davomida «Inter», «Fiorentina», «Lasio», «Parma», «Vest Xem Yunayted», «Al-Ahli», «Al-Nasr» kabi klublarda to‘p tepgan. Ushbu yil "Garafa"ga "Arabi"dan kelib qo‘shildi.

28 yoshli Vayss «Manchester Siti», «Reyndjers», «Espanyol», «Olimpiakos» singari mashhur klublarda o‘ynagan. "Garafa"da 2016 yildan beri o‘ynab kelmoqda.

11 turdan keyin jamoa 11 ochko bilan 7-pog‘onani egallab turibdi. So‘nggi besh turda jamoa bir marta g‘alaba qozonib, ikki bor durang o‘ynadi. Uydagi uchrashuvlarda joriy mavsum 2 g‘alaba, 4 durang va 1 mag‘lubiyat kuzatildi. 11 dekabr kuni "Garafa" Qatar Kubogi doirasida "Sayliya" mehmoni bo‘ladi.