Ispaniya terma jamoasi tarkibida 2010 yil jahon chempionatining bosh sovriniga ega chiqqan tajribali darvozaboni Viktor Valdes futbolchilik faoliyatini yakunladi. Bu haqda La Liganing Twitter’dagi rasmiy sahifasi xabar bermoqda.
Valdes avvaliga ijtimoiy tarmoqdagi sahifasiga “Barchasi uchun rahmat” deya yozib qoldirdi va birozdan so‘ng 35 yoshli darvozabon internetdagi barcha sahifalarini o‘chirib yubordi.
Ma’lumot uchun, Valdes 2002-2014 yillar davomida “Barselona” klubida Ispaniyaning 6 karra chempioni bo‘ldi.
Bundan tashqari, 3 marta Qirol kubogi, 3 marta YECHL bosh sovrini va ikki marta klublar o‘rtasidagi jahon chempionati musobaqalarida g‘olib chiqqan.
Viktor “Barselona”dan ketgandan so‘ng, “Manchester Yunayted”, “Standard” va “Midlsbro” jamoalarida faoliyat olib bordi.
Valdes Ispaniya futbolchisi sifatida jahon chempioni va Polsha-Ukrainada o‘tgan Yevropa chempionatida maydonga biror marta tushmasdan musobaqa g‘olibiga aylangandi.
